8 iyul 2025-ci il tarixində Azərbaycan Tekstil Assosiasiyası (ATA), İxracın və İnvestisiyaların Təşviqi Agentliyi – AZPROMO ilə birgə, Tacikistan Respublikasının paytaxtı Düşənbə şəhərində keçirilən Birinci Beynəlxalq Tekstil Forumunda iştirak etmişdir. Tədbir Beynəlxalq Tekstil İstehsalçıları Federasiyası (International Textile Manufacturers Federation – ITMF) və Tacikistanın müvafiq dövlət qurumlarının birgə təşkilatçılığı ilə baş tutmuşdur.
Forum çərçivəsində Azərbaycan Tekstil Assosiasiyasının İcraçı direktoru Fəridə Axundova və Tacikistan Pambıq və Tekstil Assosiasiyasının sədri Umed Şomurodov arasında Anlaşma Memorandumu imzalanmışdır. Sənəd hər iki ölkənin pambıqçılıq, ipəkçilik, tekstil və yüngül sənaye sahələrində strateji və uzunmüddətli əməkdaşlığını, ixrac potensialının genişləndirilməsini, davamlı inkişafın təşviqini və sənaye kooperasiyasını nəzərdə tutur.
Sözügedən memorandum, Azərbaycanın tekstil sektorunun beynəlxalq əməkdaşlığa açıq olduğunu, həmçinin regional tərəfdaşlarla birgə inkişaf və təcrübə mübadiləsi imkanlarını aktiv şəkildə dəyərləndirdiyini göstərir. Eyni zamanda sənaye üzrə texnoloji biliklərin paylaşılması və qarşılıqlı investisiya təşəbbüslərinin formalaşmasına da şərait yaradacaq.
Forum Tacikistanın Sənaye və Yeni Texnologiyalar Nazirliyi və Tacikistan Respublikası Hökumətinin dəstəyi ilə təşkil olunmuşdur. Tədbirdə 50-dən artıq ölkədən sənaye nümayəndələri iştirak etmiş, tekstil və tikiş avadanlıqları sərgisi, mövzu üzrə panel müzakirələr, eləcə də B2B və G2B formatlı görüşlər keçirilmişdir.
Azərbaycan Tekstil Assosiasiyası bu cür beynəlxalq platformalarda fəal iştirakı ilə Azərbaycanın tekstil və yüngül sənaye sahələrinin qlobal dəyər zəncirində yerinin möhkəmləndirilməsi və yerli istehsalçılar üçün yeni tərəfdaşlıq imkanlarının yaradılması istiqamətində fəaliyyətini davam etdirir.
